🛑आरक्षण वर्गीकरणासाठी बलिदान देणाऱ्या अविनाश खंडागळे यांचे बलिदान व्यर्थ जाऊ देणार नाही – लोकसेवक युवराज दाखले

🛑आरक्षण वर्गीकरणासाठी बलिदान देणाऱ्या अविनाश खंडागळे यांचे बलिदान व्यर्थ जाऊ देणार नाही – लोकसेवक युवराज दाखले

पिंपरी-चिंचवड, दि. २२ जून २०२६ : धाराशिव जिल्ह्यातील मातंग समाजाचे तरुण कार्यकर्ते स्व. अविनाश खंडागळे यांनी आरक्षण वर्गीकरणाच्या मागणीसाठी दिलेले बलिदान अत्यंत वेदनादायी असून त्यांचे बलिदान व्यर्थ जाऊ दिले जाणार नाही, अशी ठाम भूमिका हिंदू मातंग सेना व शिवशाही शासन पक्षाचे संस्थापक प्रमुख लोकसेवक युवराज भगवान दाखले यांनी व्यक्त केली.

युवराज दाखले यांनी समाजबांधवांना भावनिक आवाहन करताना सांगितले की, “अविनाश दादा शहीद झाला, त्याचे रक्त सांडले; मात्र यापुढे कोणत्याही तरुणाने असे टोकाचे पाऊल उचलू नये. आरक्षणासाठीचा लढा घटनात्मक, न्यायालयीन आणि लोकशाही मार्गानेच लढला जाईल. समाजाला न्याय मिळेपर्यंत संघर्ष सुरू राहील, पण जिवंत राहून लढा देणे अधिक महत्त्वाचे आहे.”

ते पुढे म्हणाले की, सर्वोच्च न्यायालयाने १ ऑगस्ट २०२४ रोजी आरक्षण वर्गीकरणाला मान्यता दिली असून आता शासनाने मातंग समाजाला लोकसंख्येच्या प्रमाणात आरक्षण देण्याची वेळ आली आहे. शासनाने दुर्लक्ष केल्यास भविष्यात घडणाऱ्या अशा घटनांची संपूर्ण जबाबदारी शासनावर राहील, असा इशाराही त्यांनी दिला.

युवराज दाखले यांनी स्व. अविनाश खंडागळे यांच्या मृत्यूप्रकरणी एफआयआर दाखल करण्याची भूमिका जाहीर केली असून आरक्षण उपवर्गीकरणाला विरोध करणाऱ्या व्यक्तींसह संबंधित जबाबदार घटकांवर कारवाईची मागणी केली आहे.

“आद्यक्रांतीगुरू लहुजी वस्ताद बाबांचे ‘शिक्षित व्हा, संघटित व्हा, संघर्ष करा’ हे विचार अंगीकारून समाजाने आत्महत्येचा मार्ग न स्वीकारता न्यायासाठी संघटित संघर्ष करावा,” असे आवाहनही त्यांनी केले.
स्व. अविनाश खंडागळे यांच्या बलिदानामुळे मातंग समाजाच्या आरक्षणाच्या प्रश्नाला नवी दिशा मिळाली असून त्यांच्या स्वप्नपूर्तीसाठी संघर्ष अधिक तीव्र करण्याचा निर्धार समाजबांधवांनी व्यक्त केला आहे.

🛑”शहीद अविनाश खंडागळे यांचे बलिदान व्यर्थ जाऊ देणार नाही” – युवराज दाखले
🛑मातंग आरक्षणासाठीचा लढा जिवंत राहून लढूया; आत्महत्या नव्हे संघर्ष करा – युवराज दाखले
🛑अविनाश खंडागळे यांच्या बलिदानानंतर मातंग समाज आक्रमक; शासनाला इशारा
🛑आरक्षण वर्गीकरणासाठी बलिदान; न्यायासाठी घटनात्मक लढ्याची हाक